Makrelkanningarnar byrjaðar

Árligu makrelkanningarnar eru byrjaðar. Talan er um eina stóra altjóða felagskanning, sum miðar eftir at lýsa vistskipanina við serligum denti á makrel í Norðurhøvum í juli, skrivar Havstovan. 

Talan er um eina yvirlitstroling eftir makreli, umframt ekkókanningar av sild og svartkjafti.  Umhvørviskanningar verða eisini gjørdar at máta hita, salt og nøgdina av djóraæti í sjónum.

Byrjaðu í gjár

Høvuðsendamálið er at fáa til vega vísital fyri makrelstovnin, ið skal nýtast til stovnsmetingarnar seinni í summar. Seks skip eru við í kanningunum. Íslendska rannsóknarskipið Árni Friðriksson og Tróndur í Gøtu byrjaðu í gjár.

Komandi dagarnar byrja trý skip afturat, eitt í Norðsjónum og tvey í Norskahavinum. Sætta skipið fer at gera kanningar í grønlendskum øki seinni í mánaðinum.

Á heimasíðuni hjá Havstovuni, hav.fo, ber til at síggja hvar skipini eru stødd, og hvussu langt tey eru komin við kanningunum.