Tjóðleikhúsið boðið út

Tjóðleikhúsið skal vera í Havn, men tað er als ikki vist, at tað verður á Skálatrøð. Tað segði Jenis av Rana, landsstýrismaður, í løgtinginum í gjár.

Tríggjar milliónir krónur eru í fíggjarlógini í ár til tjóðleikhús. Tjóðleikhúsið hevur verið leingi á veg.

Í fíggjarlógini fyri 2011 vóru fimm milliónir til tjóðleikhúsið. Uppskot um byggiskrá var liðugt við árslok 2017 og dagført í november 2018.

Óbrúkt játtan flutt

Í 2018 vórðu játtaðar tríggjar milliónir afturat. Óbrúkt játtan, 7,1 millión, varð síðani flutt til 2019.

Í ár er óbrúkta játtanin dottin burtur, men nýggj játtan, sum er tríggjar milliónir krónur er komin í fíggjarlógina.

Ætlanin er, at verkætlanin partvíst skal fíggjast við uttanhýsis fígging. Í tí sambandi má lógaruppskot um at útvega uttanhýsis fígging til at byggja tjóðleikhús leggjast fyri løgtingið.