Her er eingin smittaður í 100 dagar

Nú eru 100 dagar farnir, síðani tann seinasti í Ný Sælandi varð smittaður við koronu. Tað skrivar bretska kringvarpið, BBC.

Í Ný Sælandi var seinastu smittutilburðurin staðfestur 1. mai. Tað hendir fáar dagar eftir, at landið spakuliga varð latið uppaftur.

Síðani tá eru allir tilburðir av koronu komnir við útlendskum ferðafólkum, og tað hevur gjørt tað lættari hjá myndugleikunum, at hava tamarhald á støðuni.

Í løtuni eru 23 fólk sjúk í Ný Sælandi, og tey eru øll avbyrgd. Landið hevur klárað seg væl betri enn nógv onnur lond. Síðani í februar hava 1.569 fólk verið sjúk, og 22 eru deyð av COVID-19 virusinum.