UEFA tekur avgerð um dystin í dag

Umboðið hjá UEFA, sum er í Føroyum í sambandi við Champions League-dystin millum KÍ og Slovan Bratislava, fer í dag at avgera, hvussu verður við dystinum, sum er á skránni í kvøld.

Ferðalagið úr Slovakia kom til Føroya mánadagin. Seinnapartin í gjár varð staðfest, at ein í ferðalagnum, ein fysioterapeutur, hevur korunusmittuna.

Farsóttarnevndin gjørdi av, at antin skal ferðalagið úr Slovakia í sóttarhald, ella skal tað fara av landinum aftur.

 >> SÍ EISINI Slovan Bratislava hópurin skal av landinum

UEFA avger í dag, hvussu verður við dystinum, sum skal vera í Klaksvík í kvøld. UEFA hevur sagt, at allir dystir í hesum umfarinum skulu verða spældir í seinasta lagi fríggjadagin 21. august. 

Um dysturin í Klaksvík ikki verður spældur, avger UEFA, hvat hendir. Og tann avgerðin kemur í dag, sigur formaðurin í KÍ, Tummas Lervig.

Í farnu viku dømdi UEFA felagið KF Drita úr Kosovo at tapa ein dyst í Champions League, eftir at allur hópurin mátti í sóttarhald, tí tveir spælarar høvdu fingið koronusmittuna.