5.800 fólk í Svøríki deyð av korona

Svøríki hevði eina aðra skipan, enn onnur lond, tá koronasmittan fór at gera um seg, og tað merkist nú í svensku hagtølunum.

Fyrstu seks mánaðirnar doyðu 4.500 fólk av korona í Svøríki.

Fyrstu seks mánaðirnar doyðu næstan 52.000 fólk í Svøríki, og tað er hægsta talið síðani í 1869 tá 55.431 fólk doyðu, tey flestu av hungursneyð.

Fleiri svenskir miðlar endurgeva svensku hagstovuna, sum hevur gjørt tølini upp.

Fyri 150 árum síðani búðu 4,1 milliónir fólk í Svøríki. Í dag búgva 10,3 milliónir fólk í landinum.

Koronakreppan hevur gjørt við sær, at fyrstu seks mánaðirnar vaks fólkatalið í Svøríki við 24.800 fólkum, og tað er lægsti vøkstur síðani í 2005.

Verða juli og august tiknir við, so eru 5.800 fólk í Svøríki deyð av korona, og tað er nógv hægri enn í hinum norðurlondunum, sum settu strong tiltøk í verk, fyri at basa koronasmittuni.