Fáa nógv fyri toskin

Prísurin á toski er hækkaður munandi aftur, eftir at hann lækkaði niður í helvt fyrr í ár, tá koronakreppan tók seg upp.

Uppgerðin hjá Fiskamarknaðinum í dag vísir, at besti prísurin fyri tosk 1 var 33,10 kr. fyri kg, og fyri tosk 2 var hægsti prísurin 33 kr. fyri kg. Miðalprísurin fyri tosk 1 var beint undir 33 kr., og næstan 28 kr. fyri tosk 2.

Talan var kortini um smár nøgdir, 150 pund av toski 1 og 350 pund av toski 2.

Toskur 3 hevði eisini góðan prís, upp í 29,20 kr. fyri kg.

Toskur 4 varð seldur fyri upp í 21,90 og toskur 5 upp í 14,40 kr. fyri kg.

Prísurin á hýsu var eisini góður. Hýsa 1 til 3 varð seld fyri miðalprís, sum var millum 12,91 og 16, 33 kr. fyri kg.

Fiskamarknaðurin seldi sløk 70.000 pund, og størstu nøgdirnar vóru av toski, hýsu og havtasku.