Umdystur í talvi

Nú klokkan tvey byrjaði umdystur um føroyameistaraheitið í talvi fyri einstaklingar. Dysturin stendur millum Høgna Egilstoft Nielsen úr Sandavágs Talvfelag og 14 ára gamla Luitjen Akselsson Apol úr Havnar Telvingarfelag.

Teir endaðu javnir í Landsliðsbólkinum við seks stigum hvør eftir sjey umfør, tá FM-stevnan endaði í gjár.

Í umdystinum verða fyrst tvey kviktalv telvað. Telvararnir hava tá 25 minuttir hvør umframt fimm sekund fyri hvønn fluttan leik. Stendur á jøvnum eftir kvikkappingina, verða tvey snartalv tikin.

Tá fáa telvararnir tríggjar minuttir hvør umframt tvey sekund fyri hvønn fluttan leik. Endar snartelvingin eisini jøvn, verður avgerðin at falla í sonevndum Armageddon-talvi.

Tá fær hvítur seks minuttir og svartur fimm minuttir. Endar talvið javnt, vinnur telvarin við svarta fólkinum.

Fylgjast kann við leik fyri leik á heimasíðu Talvsambandsins - faroechess.com.

Telvað verður í Løkshøll í Runavík.