Viðgera barsilsfarloyvi til samkynd í aðru viku

Uppskotið um at geva samkyndum foreldrum barsilsfarloyvi og barsilspening er ikki komið á skránna hjá løgtinginum.

Átta andstøðutingfólk løgdu uppskotið fram tann 20. oktober. Men fyrsta viðgerð hevur ikki verið enn.

Og hon er heldur ikki á skránni fyri næsta tingfund, sum verður 12. november.

Onkur í samgonguni sigur seg taka undir við uppskotinum. Onnur eru hart ímóti tí.

Løgmaður hevur sagt, at landsstýrið er á veg við einum uppskoti um barsilsfarloyvi og barsilspening til samkynd. Men tað er ikki komið enn.

Eingin freist

Mál, sum skulu avgreiðast fyri nýggjár, skuldu leggjast fram í seinasta lagi í gjár. Tað ber tó til enn at koma í tingið við uppskotum, men tey uppskotini krevja undirskriftir frá 17 tingfólkum.

Sambært tingskipanini er eingin freist frá tí, uppskot koma í tingið, til fyrsta viðgerð er.

Jógvan á Lakjuni, løgtingsformaður, sigur, at málið fær fyrstu viðgerð í aðru viku.

Av tí at nógv løgtingsfólk eru uppstillað, nú kommunuval verður, bíða nógv tingmál til eftir valið, sigur løgtingsformaður.