Kambur komin til Føroya

Nýggja frystilínuskipið Kambur, sum felagið M&S Strendur, hevur keypt úr Noregi, kom á Havnina í morgun.

Frystilínuskipið skal avloysa verandi Kamb, sum felagið á Strondum hevur selt til eitt felag í Vestmanna.

Frystilínuskipið er bygt í 1998, er 46 metrar langt, 11 metrar breitt og tekur 320 tons.

Skipið hevur dragibrunn, sum merkir, at teir draga línuna upp gjøgnum skipið.

Frammanundan er tað bara eitt línuskip í landinum, sum hevur dragibrunn, og tað er Klakkur, sum eisini er keyptur úr Noregi.

Nýggi Kambur kom á Havnina klokkan 9 í morgun, og skipið fer skjótt av Havnini aftur, upplýsir Tórshavnar Havn.

Í sambandi við at nýggi Kambur kemur til Føroya, verður skipað fyri almennari móttøku á havnarlagnum á Hulki.

Koronutilmælini verða fylgd, og øll vitjandi verða skrásett, skrivar Sjóvar kommuna.