Føroyingar halda seg hava góða heilsu

Føroyingar halda seg hava góða heilsu, og fleiri í Føroyum enn í Danmark halda seg hava góða heilsu.

Tó eru nógv ung, sum stríðast við ringa sálarliga heilsu, sigur Fólkaheilsuráðið.

Fíggjarstøðan tyngir tey ungu, tey hava ilt við at sova og brúka pínustillandi og nervastillandi heiligvág. 

Fólkaheilsuráðið mælir til, at myndugleikarnir gera eina breiða og burðardygga fyribyrgingarætlan, har høvuðsdentur verður lagdur á at styrkja sálarligu og sosialu heilsuna hjá ungum. 

Brúk er fyri batum, tá ræður um vekt, rørslu og royking, sigur Fólkaheilsuráðið.

Helvtin svaraði

Í fjør gjørdi Fólkaheilsuráðið eina stóra fólkaheilsukanning. 6.000 tilvildarliga vald fólk vórðu spurd, helvtin svaraði.

Fyrstu niðurstøðurnar vísa, at føroyingar sum heild meta seg hava góða heilsu, og føroyingar meta seg í størri mun hava góða heilsu, enn til dømis danir gera. 

93 prosent av føroyingum meta heilsuna vera avbera góða, stak góða ella góða. Hjá dønum er talið 83 prosent. 

Fleiri kvinnur enn menn meta heilsustøðuna vera góða.

Tey flestu, sum siga seg hava góða heilsu, eru fólk, sum eru millum 45 og 54 ár.

Tíggju prosent av teimum ungu millum 18 og 24 ár siga seg hava minni góða ella vánaliga heilsu.