Innlánini eru fimm milliardir størri enn útlánini

Peningastovnarnir í Føroyum hava fimm milliardir krónur meira standandi inni, enn teir hava lænt.

Innlánini eru 24,8 milliardir krónur, og útlánini eru 19,8 milliardir. Innlánsyvirskotið er tí fimm milliardir krónur.

Millumbanka innlán og útlán eru ikki tald við í hesum tølunum.

Men útlendsk viðskiftafólk hjá føroysku peningastovnunum eru tald við. 

Húsarhald hava størsta yvirskotið

Taka vit bara føroysk viðskiftafólk, eru innlánini 17,2 milliardir og útlánini 15,7 milliardir, so her er innlánsyvirskotið 1,5 milliard.   

Tað eru í størsta mun húsarhaldini, sum hava innlánsyvirskot í føroysku peningastovnunum, sigur Landsbankin.  Húsarhaldini hava umframt skuld í føroysku peningastovnunum sethúsalán í donskum realkredittstovnum. 

Um skuldin hjá húsarhaldunum til donsku realkredittstovnarnar verður tald við, hava húsarhaldini eitt innlánsyvirskot, sum var 233 milliónir krónur tann 30. september.  

Vinnan og kommunurnar hava størri skuld í føroysku peningastovnunum, enn tær eiga inni.