Ståle Solbakken norskur landsliðsvenjari

Ståle Solbakken varð í gjár settur í starv sum norskur landsliðsvenjari í fótbólti, minni enn tveir mánaðir eftir at hann fekk sekkin í danska stórfelagnum FC Keypmannahavn.

Solbakken tekur við starvinum nú mánadagin 7. desember og avloysir svian Lars Lagerbäck, sum hevur havt leiðsluna av norska landsliðnum síðani februar 2017. Hann hevði sáttmála til og við 2022, men fer altso úr starvinum nú.

Sáttmála til 2024

Forsetin í norska fótbóltssambandinum, Terje Svendsen, sigur, at Noreg við starvssetanini hugsar longri fram í tíðina, og Solbakken hevur fingið ein sáttmála, sum gongur fram til 2024.

Í farnu EM-undankapping endaði Noreg á triðja plássi í sínum undanbólki, aftanfyri Spania og Svøríki, men frammanfyri Rumenia, Føroyar og Malta. Noreg vann báðar dystirnar móti Føroyum, 2-0 á Tórsvølli og 4-0 í Oslo.

Lutakast verður til komandi HM-undankapping nú mánadagin, sama dag sum Ståle Solbakken alment tekur við sum norskur landsliðsvenjari.