Føroyar og Noreg: Kvoturnar óbroyttar næsta ár

Semja fekst ikki um broytingar, men meira kann tó fiskast av russisku kvotuni í norskum sjógvi

Sjúrðarberg er ein av trolarunum, sum fiskar í Barentshavinum. Kvotan í norskum sjógvi verður óbroytt, men føroysk skip sleppa at fiska størri part av russisku kvotuni í norskum sjógvi næsta ár

Johnsigurd Johannesen

09.12.2020 - 15:40

Hóast serliga toskakvotan í norskum sjógvi hækkar munandi næsta ár, og Føroyar vóru sinnaðar at lata afturfyri størri toskakvotu, fekst eingin semja um broytingar í fiskirættindasáttmálanum næsta ár.

Noreg og Føroyar eru tí samd um at kvotabýtið næsta ár verður tað sama sum í ár.

Føroysku kvoturnar av botnfiski í norskum sjógvi verða 4.945 tons av toski, 1.100 tons av hýsu, 500 tons av upsa og 400 tons av øðrum fiskasløgum.

Norsk skip sleppa at fiska 2.500 tons av blálongu, 2.000 tons av brosmu, og kvotan av øðrum fiskasløgum verður 800 tons. Makrelkvotan í føroyskum sjógvi verður eisini óbroytt, 6.600 tons.

600 tons meira

Umframt kvotabýtið sleppa føroysk skip eisini at fiska 4.000 tons av toski og 350 tons av hýsu, sum eru fingin til vega í sínámillum avtaluni millum Føroyar og Russland, í norskum sjógvi.

Tað eru 600 tons meira enn í ár.

Norska kvotan av svartkjafti í føroyskum sjógvi hækkar 4.800 tons, upp í 34.800 tons.