Biden formelt valdur

Demokraturin, Joe Biden, varð í gjár formelt valdur til forseta í USA, eftir at 306 valfólk atkvøddu fyri honum og varaforsetanum, Kamala Harris

Í talu stutt eftir atkvøðugreiðsluna, gav Biden sitandi forseta, Donald Trump, greið boð um at góðtaka, at hann hevði tapt valið.

Trump viðurkennir framvegis ikki valúrslitið

Joe Biden nevndi í taluni, at Trump í 2016 segði, at hann við 306 atkvøðum frá valfólkunum, hevði vunnið stórsigur. 

Verður tað roknað sum greiður sigur, skjýtur Biden, við allari virðing, upp, at Trump nú góðtekur, at Biden hevur vunnið.

Forsetin, Donald Trump, hevur sýtt fyri at viðurkenna valúrslitið á forsetavalinum, og hevur fleiri ferð sagt, at valsvik er farið fram.

Biden: Eg vóni ikki, slíkt hendir aftur

Joe Biden fanst eisini at Trump í taluni, og segði, at forsetin gongur í móti grundlógini og "fólksins vilja", tí hann ikki góðtekur ósigurin.

Advokatar hjá Trump hava sent inn meira enn 50 skuldsetingar móti valinum, men tær eru vístar aftur í fleiri statum - íroknað hon, sum varð skotin inn fyri Hægstarætt.

– Eg vóni inniliga, at vit ongantíð aftur skulu uppliva slíkar hóttanir og misnýtslu, sum vit hava sæð á hesum valinum, segði Joe Biden.