Meira enn 5.000 kr. á muni fyri sama arbeiði

Við broytingini í lógini um tillagað størv, sum løgtingið endaliga samtykti í dag, verður stórur munur á teimum, sum eru í skipanini í løtuni, og teimum, sum koma í skipanina eftir 1. januar.

Ein lærari í tillagaðum starvi, har arbeiðsførleikarnir eru 30 prosent, fær eftir galdandi skipan 31.300 krónur um mánaðin. Tað fær hann framvegis eftir 1. januar, tí broytingin umfatar bara tey, sum koma í skipanina eftir nýggjár.

Men kemur ein lærari við somu skerdum førleikum í skipanina eftir 1. januar, fær viðkomandi 25.725 krónur um mánaðin, ella 5.575 krónur minni enn hin, sum longu er í skipanini frammanundan. 

Spara fimm milliónir

Uni Rasmussen, formaður í Trivnaðarnevndini, sigur, at lógarbroytingin hevur við sær, at landskassan sparir fimm milliónir kr.

Stóru andstøðuflokkarnir hava funnist hvassliga at lógarbroytingini, og teir mæltu til at fella uppskotið.

Undir viðgerðini í dag vístu tingfólk í andstøðuni á, at tað er skeivt at broyta eina skipan, sum riggar. Tey vístu eisini á, at tað er órættvíst, at fólk við somu førleikum skulu fáa ymiska løn í framtíðini.

Eiga at fáa somu virðing

Tóra við Keldu, forkvinna í Megd, hevur eisini funnist at ætlanini um at broyta skipanina. Hon vísir millum annað á týdningin av, at fólk við skerdum førleikum varðveita tilknýti til arbeiðsmarknaðin og fáa somu virðing sum onnur.

Eftir galdandi skipan fáa fólk í tillagaðum starvi ískoyti frá tí almenna, so at tey fáa somu sáttmálaløn sum onnur á arbeiðsmarknaðinum. 

Tá atkvøtt varð við triðju viðgerð í dag, vóru 16 atkvøður fyri, 11 ímóti, og tvær atkvøður vóru blankar.

Frammanundan atkvøddi tingið um eitt broytingaruppskot frá meirilutanum í trivnaðarnevndini, um at ongar broytingar skulu gerast í skipanini fyri tey, sum longu eru í skipanini. Tó skal mesta lønarískoytið vera 22.000 kr. Broytingaruppskotið varð einmælt samtykt.

Meiri verður at frætta um hetta málið í Degi og Viku í kvøld.