Arbeiðið verður boðið út í januar

Arbeiðið at byggja fyri Sjóvinnustýrið á Giljanesi verður boðið út í januar, í viku tvey.

Tað sigur Helgi Abrahamsen, landsstýrismaður, í svari til Jóhannis Joensen, løgtingsmann.

Umsitingarbygningurin hjá Sjóvinnustýrinum verður boðin út sum heildararbeiðstøka. Tann, sum vinnur útboðið, skal tekna, projektera og byggja.

Løgtingið samtykti í 2017, at Sjóvinnustýrið skuldi byggja í Vágum fyri í mesta lagi 13,7 mió. kr.

Verklagslógin um byggingina varð samtykt á vári 2018. 

Í fíggjarlógini í ár eru 5,3 mió. kr. til byggingina.

Sjóvinnustýrið hevur síðani á sumri 2016 húsast í fyribilshølum í Havn, eftir at stovnurin noyddist at flyta úr leigaðum hølum í Miðvági, sum ikki vóru mett at vera egnað.