Trý fólk á Landssjúkrahúsið eftir ferðsluóhapp

Trý fólk vórðu flutt á Landssjúkrahúsið til nærri kanningar og viðgerðar, eftir eitt álvarsligt ferðsluóhapp á landsvegnum oman fyri Syðrugøtu í morgun.

Fjórða fólkið, sum var við í ferðsluóhappinum, fór sjálvt á landssjúkrahúsið at lata seg kanna. 

Løgreglan fekk fráboðanina klokkan 8:24, og fleiri politibilar, sjúkrabilar og sløkkiliðsbilar vórðu sendir á staðið. Tríggir bilar vóru í óhappinum.

Allir bilarnir fóru sera illa og gjørdust vrak. Ein av bilunum fór mestsum í tvey, sigur vakthavandi hjá løgregluni. Neyðugt var at skera allar bilarnar fyri at fáa fólkini leys.

Helst ein yvirháling

Løgreglan er ikki liðug við avhoyringarnar enn, men sigur, at tað helst var ein yvirháling, ið var orsøk til óhappið. 

Beint eftir óhappið vóru langar bilrøðir á báðum síðum. Vegurin varð stongdur, og ferðslan varð eina løtu leidd gjøgnum bygdarvegin í Syðrugøtu.

Politibilar fylgdu sjúkrabilunum á Landssjúkrahúsið. Støðan hjá teimum trimum, sum vórðu flutt á landssjúkrahúsið, er sambært politinum, er ikki hættislig.