Eftirmetingin kanska liðug í summar

Arbeiðsbólkurin, sum er settur at eftirmeta eldraøkið, hevur havt nakrar fundir, og hevur lagt arbeiðið til rættis, men tað er ilt at siga, nær arbeiðið verður liðugt politiskt at taka støðu til.

Eitt realistiskt boð er í summar.

Tað sigur Elsebeth Mercedis Gunnleygsdóttir, landsstýriskvinna í almannamálum, sum hevur svarað einum fyrispurningi frá Heðini Mortensen, løgtingsmanni.

Fakligi førleikin er ikki beinleiðis partur av eftimetingini, tí lógin um heimatænastu og eldrarøkt hevur ikki nakra áseting um normering ella fakligan førleika.

Men Mentamálaráðið hevur upplýst, at farið er at kanna tørvin á útbúnum starvsfólki á ávísum starvsøkjum næstu 10 árini, eisini tørvin á útbúnum fólki á eldraøkinum, sigur Elsebeth Mercedis Gunnleysgdóttir.

Kommunufelagið er partur av eftirmetingini, og kommunalu eldrasamstrøvini verða tikin við í eftirmetingina, har tørvur er á tí.

Halda kommunurnar, at tørvur er á einari innanhýsis eftirmeting, tá henda eftirmetingin er liðug, kunnu tær sjálvar avgera tað, sigur landsstýriskvinnan í svarinum til Heðin Mortensen.