Biden: 100 milliónir koppsetast eftir 100 døgum

bannari
Biden: 100 milliónir koppsetast eftir 100 døgum
Amerikanski forsetin ætlar, at ein millión amerikanarar skulu koppsetast um dagin næstu tríggjar mánaðirnar
 
25.01.2021 - 07:17

Forsetin í USA, Joe Biden, hevur undirskrivað eina fyriskipan, ið skal hjálpa landinum at berja niður koronuvirusið.

Tað gjørdi Biden longu dagin eftir, at hann varð tikin í eið sum forseti í USA mikudagin, skrivar tíðindastovan, Ritzau.

Andlitsmaskur verða kravdar

Sambært fyriskipanini verður tað eitt krav, at fólk skulu brúka andlitsmasku í floghavnum og almennu flutningsleiðunum.

Biden sigur tað vera harmiligt, at andlitsmaskur eru vorðnar ein politiskur spurningur, tí hann heldur tað vera eitt neyðugt vápn í stríðnum ímóti COVID-19.

Fyriskipanin varpar eisini ljós á tiltøk, ið skulu tryggja landinum fleiri koppsetingar - bæði í framleiðsluni og innkeypinum.

Biden: Verandi koppsetingarætlan vanlukkulig

Mátin, sum koppsetingin í USA higartil er býtt út eftir, hevur verið vanlukkuligur, sigur amerikanski forsetin.

Umsitingin hjá Joe Biden ætlar at koppseta 100 milliónir amerikanarar teir fyrstu 100 dagarnar, Biden situr í embætinum.

Tað er ein avbjóðing, men tað ber til, verður Biden endurgivin fyri at siga.

Ætlanir lagdar fyri stjórnina

Ein fyriskipan er ein almenn váttan frá forsetanum. Fyriskipanir eru at rokna sum bindandi, men fyriskipanir skulu gjøgnumgangast løgfrøðiliga.

Áðrenn Biden undirskrivaði fyriskipanina, legði hann fram ætlanirnar hjá stjórnini. Tá segði hann, at innferðarkrøvini í USA verða herd.

Hetta merkir, at ferðafólk, ið koma til USA, skulu hava eina negativa koronukanning áðrenn tey seta seg í flogfarið við kós móti USA. Somuleiðis skulu tey í sóttarhald, tá tey koma til landið.

Sóttarhald verður kravt við komu

Tað hevur ikki verið eitt krav, at fólk, ið koma til USA, skulu í sóttarhald, tá tey komu til landið. Sostatt gongur Biden aðra leið enn hana, Trump gjørdi.

Okkara tjóðskaparliga ætlan er umfatandi, og ætlanin byggir á gransking og ikki politikk, sigur Joe Biden, sambært tíðindastovuni hjá Ritzau.

Nýggja ætlanin hjá USA, ið skal hjálpa landinum at fáa tamarhald á koronusmittuni aftur, er tilsamans198 síður til longdar.

Er kopiera
Nýggjastu sendingar í ÚV
Nýggjastu sendingar í SV
Hósdag 28. mars
Guðstænasta úr Kollafjarðar kirkju
172938
Týsdag 26. mars
Veðrið
172832
Mánadag 25. mars
Beautyvarpið við Tanju
172718
Sunnudag 24. mars
Mein fyri lívið
172652