Biden og Putin hava tosað í telefon

Russiski forsetin, Vladimir Putin, og amerikanski forsetin, Joe Biden, hava tosað saman fyri fyrstu ferð, síðani Biden gjørdist forseti. 

Tað váttar talsfólkið hjá Biden.

Sambært AP-tíðindastovuni, skal amerikanski forsetin hava greitt russiska forsetanum frá síni stúran um eiturálopið á andstøðupolitikaran, Alexej Navalnyj, sum varð handtikin, tá hann kom aftur til Russlands fyrr í hesum mánaðinum.

Amerikanski forsetin skal eisini hava sagt Putin, at hann stuðlar Ukraina móti tí, sum hann nevnir "russiskan ágang".

Leingja eftirlitsavtaluna

Illgrunin um, at russar løgdu seg út í amerikanska valið og telduálop á amerikanskar myndugleikar, vórðu eisini umrødd í telefonsamrøðuni, siga Hvítu Húsini.

Biden segði eisini við russiska leiðaran, at báðar tjóðirnar eiga at leingja fimm ára vápnaeftirlitsavtaluna, sum fer úr gildi í februar.

Stigið til telefonsamrøðuna tók Moskva, og Biden tók av, men hann vildi fyrst fyrireika seg við at tosa við sameindar ríkisleiðarar í Evropa,  millum annað ríkisleiðararnar í Bretlandi, Frakland og Týsklandi, skrivar AP.