Herurin tikið valdið í Myanmar

Herurin tikið valdið í Myanmar
Politiski leiðarin, Aung San Suu Kyi, er sett føst, og undantaksstøða er lýst í eitt ár
Aung San Suu Kyi er millum politisku leiðararnar í Myanmar, sum eru settir fastar. Hervaldið sigur, at svik varð framt á valinum í november
 
01.02.2021 - 08:40

Herurin í Myanmar, sum fyrr kallaðist Burma, hevur tikið valdið í landinum. 

Tað skriva fleiri altjóða miðlar.

Hetta hendi í nátt, tá fólk í herinum handtóku virkandi politiska leiðaran, Aung San Suu Kyi, umframt aðrar politikkarar.

Hetta varð kunngjørt á einari sjónvarpsrás hjá herinum, og samstundis boðaði herurin frá, at undantaksstøða er lýst í eitt ár.

Bæði telefon- og internetsamskifti er avmarkað, og nógv hernaðarakfør eru at síggja í býunum kring landið. Eisini hava allir bankar latið, og sjálvtøkur eru óvirknar.

Herurin sigur, at valsvik er framt

Støðan hevur verið sera spent millum herin og sivilu stjórnina síðani tjóðartingsvalið í november í fjør, tí herurin vil vera við, at umfatandi valsvik varð framt.

Á valinum vann flokkurin hjá Suu Kyi 83 prosent av umboðunum í tinginum.

Andstøðan, sum er tætt knýtt at hervaldinum, vil vera við, at svik er framt í 8,6 milliónir førum. Valnevndin vísir aftur, at svik er framt, men viðurkennir, at mistøk vórðu gjørd á nøkrum av vallistunum.

Eftir at tíðindini um handtøkurnar bórust, heitti ein talsmaður fyri flokkin hjá Suu Kyi á fólk um at vera rólig, og at halda lógina.

Annað valið

Hetta var onnur ferðin, at val var í Myanmar, síðani hernaðarstýrið fall 2011. Flokkurin hjá Suu Kyi vann eisini valið í 2015.

Aung San Suu Kyi fekk friðarheiðursløn Nobels í 1991, meðan hon sat í húsavarðhaldi.

Hon hevur tó verið fyri hvøssum atfinningum fyri handfaringina av muslimska Rohingya-minnilutanum í 2017, tá tey í túsundatali máttu flýggja undan løgregluni til Bangladesh.
 

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585