Landsstýrismaðurin nøgdur við koppsetingina

Landsstýrismaðurin í heilsumálum er nøgdur við framferðina í sambandi við koronukoppsetingina á Landssjúkrahúsinum, hóast tað í Degi og Viku í gjárkvøldið kom fram, at tey á Landssjúkrahúsinum hava koppsett stjóran, fólk á stjórnarskrivstovuni, á starvsfólkadeildini, í køkinum, á vaskaríinum, á teknisku deild, á fíggjardeildini og KT-fólk.

Steinar Eirikstoft, sum eisini er forstjóri í sjúkrahúsverkinum, er ein av teimum, ið er koppsettur. 

Alexandra á Dul, stjóri á Klaksvíkar sjúkrahúsi, er ikki koppsett. Hon segði í Degi og Viku, at tey hava gjørt eina mannagongd, har ringt verður eftir sjúklingum, tá koppingarevni loypir av.

Farið er rætt fram

Kaj Leo Holm Johannessen, landsstýrismaður í heilsumálum. sigur í tíðindaskrivi, at talan er um støður, sum komu í ta fyrstu tíðina, farið var undir at koppseta fyri koronu.

Tá kom tað fyri, at skamtar lupu av, tí innkallað fólk annaðhvørt ikki møttu upp til koppseting, ella góvu avboð í evstu løtu. Eisini vísti tað seg, at tað var meira koppingarevni í gløsunum, enn vaksinuframleiðarin hevði upplýst.

Og tí heldur landsstýrismaðurin, at koppsetingin er farin rætt fram.

Sjey skamtar

Fyrstu koppsetingarnar á Landssjúkrahúsinum vóru 30. desember í fjør. Tá hevði longu verið frammi aðrastaðni í Evropa og í Danmark, haðani vit fáa koppingarevnið, at til bar at fáa upp í sjey skamtar í hvørjum glasi, heldur enn fimm, sum annars varð upplýst. Í Danmark komu tíðindini um, at sjey skamtar vóru í hvørjum glasi, 28. desember.

Av teimum umleið 4.000 fólkunum, sum higartil eru koppsett í Føroyum, eru færri enn 100 koppsett á henda hátt við avlopsskamtum, skrivar Heilsumálaráðið í tíðindaskrivi. 

Umleið 80 av hesum eru starvsfólk, sum eru í serligum vandabólki, tí tey hava beinleiðis samband við sjúklingar, og kortini skuldu verið koppsett samsvarandi koppsetingarkunngerðini.

Hini 20 hava ikki beinleiðis samband við sjúklingar í gerandisdegnum, sigur Heilsumálaráðið.