Virðisbrøv góvu 75 mió. kr. í avkasti

Landskassin fekk 75 milliónir krónur í avkasti av gjaldførinum í fjør. Tað svarar til 1,91 prosent. Tá COVID-19 rakti, fullu virðisbrøvini nógv í virði, sigur Landsbankin.

Íleggjarar seldu burtur av váðafúsu virðisbrøvunum, partabrøvunum, fyri heldur at fara yvir í meira trygg brøv, so sum statslánsbrøv og realkredittlánsbrøv. 

Um hetta mundið var avkastið hjá landskassanum minus 7,8 prosent. Men tá árið endaði, var avkastið komið upp á pluss 1,91 prosent.

Síðani 2016 hevur miðalavkastið av landskassans gjaldføri verið 2,7 prosent, ella 80 milliónir krónur um árið.