Riggar betur tá longri tíð er millum prikini

Nýggjar kanningar vísa, at koppingarevnið fyri COVID-19 frá AstraZeneca riggar betur, um tað gongur longur tíð millum fyrra og seinna prikið.

Koppingarevnið frá AstraZeneca er lættari at handfara enn tað frá Pfizer/Biontech og Moderna, tí tað ikki skal haldast kalt, men kanningar hava víst, at tað ikki riggar líka væl og hini. 

Fleiri lond avmarka nýtsluna

Fleiri lond, millum annað Danmark, hava avmarkað nýtsluna av AstraZeneca-koppingarevninum til bara at vera latið fólki sum eru 65 ár og yngri, tí ivasamt er um koppingin hevur nakran virknað á eldri fólk. 

Nú vísa fýra ymiskar kanningar, sum eru almannakunngjørdar í tíðarritinum The Lancet, at koppingarevnið frá AstraZeneca riggar betur um í minst lagi tríggir mánaðir eru millum fyrra og seinna prikið ístaðin fyri seks vikur. 

Kanningarnar eru gjørdar í Stóra Bretlandi, Brasil og Suðurafrika. AstraZeneca er góðkent í ES og í Danmark, men enn hava vit í Føroyum bara fingið koppingarevni frá heilivágsfyritøkuni Pfizer. 

Koppingin gevur eftir bæði prikini 66,7 prosent vernd fyri COVID 19.