Mark Rutte sleppur helst at halda fram

Í dag er tjóðartingsval í Hollandi. Og líkt er til, at Mark Rutte fer at halda sum forsætisráðharri.

Í veljarakanningum stendur borgarligi liberali flokkurin, VVD, til at vera størsti flokkur.

Sambært kanningunum fær flokkurin 35 tingsessir, tvífalt so nógvar sum næststørsti flokkur, Frælsisflokkurin hjá Geert Wilders.

Valhølini lótu upp mánadagin.

Koronufarsóttin ger, at valhølini hava verið opin í tríggjar dagar.

37 flokkar stilla upp

Ikki síðani seinna heimsbardaga hava so nógvir flokkar stilla upp til val í Hollandi sum hesaferð.

Roknað verður við, at 15 av teimum 37 flokkunum, sum stilla upp, fáa umboð í tjóðartingið.

Mark Rutte hevur útilokað samstarv við Frælsisflokkin hjá Geert Wilders. Hann er ov víðgongdur, heldur forsætisráðharrin.

Skuldu rinda pengar aftur

Tað var ein politisk gøla, sum var orsøkin til, at val varð útskrivað.

Í desember í fjør kom fram, at fleiri barnafamiljur vóru í árunum frá 2012 til 2019 av órøttum álagdar at rinda statinum barnapengar aftur, tí umsóknarbløð vóru ikki fullfíggjað.

Formaðurin í hollendska javnaðarflokkinum legði frá sær stutt eftir, at málið kom fram, tí hann var sjálvur ráðharri í almannamálum frá 2012 til 2017.

Men sambært veljarakanningunum ávirkar málið hinvegin ikki sjálvan forsætisráðharran.

Roknað verður við, at allar atkvøðurnar eru taldar í nátt, ella fyrrapartin í morgin.