Grønland: Trý fólk druknað

Trý fólk í Grønlandi eru druknað aftaná at jollan hjá teimum koppaði á leiðini millum Narsaq og Qaqortoq.

Tað skrivar grønlendski miðilin, Sermitsiaq. 

Tað var fríggjadagin um middagsleitið grønlendska tíð, at byrjað varð at leita eftir teimum trimum fólkunum í jolluni, eftir at tey ikki komu fram til Qaqortoq. Ein túrur, sum vanliga bara tekur umleið ein tíma.

Ein løgreglubátur, vaktarskipið Thetis hjá Arktis Kommando og tvær tyrlur luttóku í leitingini. 

Um fýra tíðina fríggjadagin funnu leitingarfólk eina kvinnu og ein mann í sjónum. Bæði vóru druknað. 

Og í gjárkvøldið varð tað triðja fólkið, ein maður, eisini funnið druknaður.

Leitingararbeiðið varð sambært Sermitsiaq darvað av kavaveðri og vánaligum sýni á leiðini.