Bilasølan álopin av teldusníkum

Bilasølan í Havn -  á facebook væl at merkja - er álopin av teldusníkum við einum følskum profili. Teldusníkarnir hava gjørt ein vanga líkur henni hjá Bilasøluni og hava sent fólki boð á messenger, um at tey hava vunnið tvey Magn kort. 

Boðini eru á donskum, og tí varnast fólk flest, at okkurt illgrunasamt er við boðunum. Harumframt vilja boðini frá teldusníkum hava, at tú trýstir á eina leinkju, so fært tú vinningin. Men hetta skal man ikki gera, tí illgruni er um, at talan er um teldusníkar sum royna at leggja ein virus á telduna hjá tær. 

Teldusníkar
Hendrik Egholm er stjóri og eigari á Bilasøluni. 

- Tey serkønu, sum hava facebook um hendi á Bilasøluni, siga, at talan er hægst sannlíkt um teldusníkar, sum royna at fáa okkurt frá tær. 
Hann heitir á fólk um ikki at trýsta á leinkjuna, men sletta boðini og fráboða facebook, at teldusníkar royna at koma á telduna.