USA: Rættarmálið heldur fram

Rættarmálið móti Derek Chauvin, fyrrverandi løgreglumanni, sum er ákærdur fyri at hava dripið George Floyd 25. maj 2020, heldur á fram í dag. 

Í farnu viku góvu 19 fólk, sum vóru vitni til handtøkuna, vitnisfrágreiðing framman fyri nevningatinginum í Minneapolis. Fleiri av teimum brustu í grát, tá ið tey royndu at leggja uppí ella mótmæltu handtøkuna, sum vardi í næstan níggju minuttir.

Rasismukjakið tikið seg uppaftur

Góðar tveir minuttir var George Floyd uttan vit. Richard Zimmerman, sum eisini var løgreglumaður á staðnum, segði, at eingin undanførsla var hjá Derek Chauvin at brúka knæið at halda George Floyd niðri so leingi. 

Derek Chauvin er ákærdur fyri manndráp av øðrum og triðja slagi. Seinni í dag skal løgregluovastin lata vitnisfrágreiðing um løgregluvenjing og taktikk í slíkum førum, sum hesin. 

Drápið á George Floyd og rættarmálið móti Derek Chauvin hava sett eld í rasismukjakið enn einaferð í USA.