Namibia vil hava hendur á íslendingum

Ákæruvaldið í Namibia ætlar at fáa tveir íslendingar, sum eru ákærdir í Fishrot-málinum, útflýggjaðar til Namibia. Men ríkisákærin í Íslandi sigur, at eingin avtala um útflýgging er millum londini.

Ríkisákærin í Namibia, Ed Maron-dedze, kunngjørdi í februar ákæruritið, har 26 fyritøkur og einstaklingar eru ákærd í málinum.

Ikki ákærdir enn

Í ákæruritinum verða teir tríggir Egil Helgi Árnason, Aðalstein Helgason og Ingvar Júliusson, nevndir, og teir hava allir verið stjórar í fyritøkum, sum Samherji eigur.

Teir eru tó ikki ákærdir. Egil Helgi Árnason og Aðalstein Helgason vóru stjórar í Esja Holding og Mermaira SEfood Namibia, og Ingvar Juliusson var fíggjarstjóri í Saga Seafood, Esja Investment og Heinaste Investment.

Fyrireikandi rættarfundur skuldi eftir ætlan verða í namibiska høvuðsstaðnum hósdagin, men fundurin er útsettur til 20. mai, skriva íslendskir miðlar.