Bretland tvífaldar bíleggingina

Bretland ætlar at tvífalda bíleggingina av COVID-19 koppingarevni, sum landið hevur gjørt við heilivágsfyritøkuna, Pfizer. Tað skrivar Sunday Times sambært tíðindastovuni, Reuters.

Teir nógvu skamtarnir eru serliga ætlaðir eldri fólkum í Bretlandi, sum í heyst eftir ætlandi skulu hava tað triðja prikið, ið skal tryggja, at tey framhaldandi eru vard móti álvarsligum fylgisjúkum, verða tey smittað.

Keldur í stjórnini siga við Sunday Times, at landið vónar at kunna tvífalda bíleggingina hjá Pfizer, so landið fær tilsamans 80 milliónir skamtar, og ikki 40, sum ætlanin annars var.

Bretland hevur skrásett 4,4 milliónir smittutilburðir síðani farsóttin tók seg upp, vísa tøl hjá Johns Hopkins University, sum fylgir smittugongdini í øllum heiminum.