Bygningurin til Sjóvinnustýrið samtyktur

Løgtingið hevur samtykt at heimila landsstýrismanninum í vinnumálum at byggja umsitingarbygning til Sjóvinnustýrið á Giljanesi fyri 30 milliónir kr.

Uppskotið varð einmælt samtykt við aðru viðgerð.

26 atkvøður vóru fyri og eingin ímóti. Málið skal hava eina viðgerð aftrat í tinginum.

3,7 mió. kr. aftrat

Helgi Abrahamsen, landsstýrismaður, metti upprunaliga í sínum uppskoti, at bygningurin fór at kosta 26,3 milliónir kr., men eftir at tilboðini komu inn, bað landsstýrismaðurin fíggjarnevndina um at hækka upphæddina 3,7 milliónir, upp í 30 milliónir kr.

Fíggjarnevndin tók undir við hesum og setti fram broytingaruppskot, og tað samtykti løgtingið.

Umsitingarbygningurin hjá Sjóvinnustýrinum á Giljanesi verður slakar 800 fermetrar.

Tilboðið, sum leyk bestu treytirnar, var slakar 24 milliónir. 6,4 milliónir krónur verða lagdar aftrat, m.a. til eykaavtalur, lønar- og prísvøkstur og fakeftirlit.