Kinesiskt rúmdarfar á Mars

Kina skrivaði søgu í nátt okkara tíð, tá eitt ómannað kinesiskt rúmdarfar lendi á Mars. Og Mars lendingin gekk væl, skrivar kinesiski statsmiðilin Xinhua.

Hetta er fyrsta sjálvstøðuga Mars missiónin hjá Kina. Umborð á rúmdarfarinum var ein sokallaður rover - tað er eitt 240 kilo tungt akfar, sum er gjørt til at koyra á jarðskorpuni á Mars.

Akfarið eitur Zhurong, og skal granska yvirflatuna á Mars í 90 dagar. Ein av uppgávunum hjá Zhurong er at leita eftir tekin um lív á Reyðu Gongustjørnini.

Kina er tann triðja tjóðin í søguni at lenda á Mars. Hinar eru Sovjetsamveldið og USA.