Skert B36-lið í morgin orsakað av koronu

Tríggir B36-spælarar eru farnir í sóttarhald, eftir at ein tilburður av COVID-19 er staðfestur tætt at B36-hópinum við monnum.

Spælararnir, talan er um, eru Lukas Enevoldsen, Mathias Thrane og Sebastian Pingel, sum er skaddur, og tískil ikki hevði spælt í morgin kortini.

– Tað verður uttan Mathias Thrane og Lukas Enevoldsen, at okkara menn skulu spæla ímóti 07 Vestur sunnudagin. Saman við Sebastian Pingel eru teir báðir settir í sóttarhald komandi dagarnar, eftir at corona hevur vitjað ov nær hjá teimum, skrivar heimasíðan hjá B36.

– B36 hevur verið í sambandi við landslæknan, og hava vit alt fyri eitt tikið neyðug atlit og gjørt neyðugar koronukanningar, so vit kunnu staðfesta, um smittan er avbyrgd, skrivar felagið.