Løgreglan kannar eldsbruna í Sandvík

Løgreglan fekk klokkan 16.40 í gjár fráboðan um, at eldur var í sethúsum í Sandvík.

Tað var persónurin, sum búði í húsinum, og sum var sloppin út við hundinum, ið boðaði frá.

Sløkkiliðini í Hvalba og av Tvøroyri vórðu boðsend, men stutt eftir klokkan 17 bóðu tey um hjálp úr Vági.

Húsini eru brend í grund, og hjallurin, ið stendur uppat, er illa farin.

Tveir bilar, ið stóðu nærhendis, hava eisini fingið stóran skaða av eldinum, sigur vakthavandi hjá løgregluni.