Útlátið hjá Shell minkast næstan helvtina

Shell hevur eina ábyrgd at minka um útlátið. Verandi ætlanir hjá Shell eru ikki nóg ítøkiligar, og Shell skal byrja at minka um útlátið alt fyri eitt, skriva millum onnur AFP og Bloomberg.

Tað vóru millum niðurstøðurnar hjá rættinum í Haag í Hollandi í gjár, sum hevur við sær, at Shell skal minka útlátið við 45 prosentum hesi komandi níggju árini.

Sjey umhvørvisfelagsskapir stevndu

Sjey umhvørvisfelagskapir høvdu stevnt Royal Dutch Shell fyri millum annað at bróta altjóða mannarættindini og París-sáttmálan

Sambært Bloomberg, so hevur Shell lovað at minka um útlátið av vakstrahúsgassi við 20 prosentum áðrenn 2030 og netto null-prosent útláti í 2050, men hetta er ikki nóg mikið avgjørdi rætturin í gjár.

Dómurin er einans lógliga galdandi í Hollandi hóast Royal Dutch Shell er eitt stórt altjóða felag, men eygleiðarar vænta, at dómurin fer at fáa stóra ávirkan fyri oljuídnaðin og kann gerast fordømi fyri líknandi sakarmál í øðrum londum.

Óvist um dómurin skal roynast í hægri rætti

Flestu lond í heiminum skrivaðu undir París sáttmálan, sum skal avmarka útlátið av vakstrarhúsgassi, so miðalhitin á jørðini ikki veksur meir enn 1,5 stig, men fyritøkur sum Shell vóru ikki við í avtaluni.

Shell vísti tí á, at tey gjørdu veruligar royndir fyri at minka um útlátið og at tað var onki lógligt grundarlag fyri rættarmálinum, tí tað eru stjórnirnar fyri tey avvarðandi londini, sum hava ábyrgdina av at røkka málunum í París sáttmálanum.

Shell fer í næstum at taka avgerð um dómurin skal skjótast inn fyri hægri rætt.