Kunnu ikki velja AstraZeneca ella Johnson&Johnson

Føroyingar, sum fyribils eru í Danmark, kunnu ikki velja at blíva vaksineraðir við vaksinuni frá AstraZeneca ella Johnson & Johnson.

Fólk kunnu annars sjálvboðin velja vaksinu frá teimum báðum framleiðarunum.

Edmund Joensen, fólkatingsmaður, spurdi Magnus Heunicke, heilsumálaráðharra, hvussu er við føroyingum, sum eru fyribils í Danmark, og ætla sær at blíva vaksineraðir í Danmark.

Í minsta lagi 30 dagar

Ráðharrin svarar, at slík fólk hava rætt til ókeypis vaksinasjón í Danmark, men treytin er, at tey eru í minsta lagi í Danmark í 30 dagar.

Og endamálið við uppihaldinum í Danmark eigur ikki at vera vaksinasjónin.

Men fólk, sum eru fyribils í Danmark, kunnu ikki velja vaksinuna frá AstraZeneca ella Johnson & Johnson.