Hungursneyð í Etiopia

Í Etiopia hava 350.000 fólk so lítið at eta, at talan er um hungursneyð, sigur ST.

ST sigur seg bera ótta fyri, at nógv fleiri fólk í landinum fara at líða hungur, og at talan er um størstu hungursneyðina seinastu 10 árini.

- Talið av fólkum, sum líða neyð, er tað størsta í heiminum síðani í 2011, tá umleið 250.000 fólk doyðu í hungri í Somalia, sigur hjálparleiðarin hjá ST í Etiopia, Mark Lowcock, sambært Ritzau.

Tað eru fólk í Tigray-landspartinum í Etiopia sum eru harðast rakt, tí har hevur kríggj verið í langa tíð millum etiopiska stjórnarherin og frælsisherin í Tigray, TPLF.

Etiopiska stjórnin hevur ikki góðkent frágreiðingina, sum ST hevur gjørt.