Andstøðan: Óvirðiligt at kalla tingið saman

- Landsstýrið hevur á ongan hátt prógvað, at alt, sum gerast kann, er gjørt, fyri at finna eina semju við Pedagogfelagið. Tvørturímóti. At tvinga eina lóg ígjøgnum, ið leggur seg beinleiðis upp í trætuna, fer at gera tað munandi truplari at loysa ósemjuna, og tað kann fáa álvarsamar langtíðaravleiðingar og leingja um verkfallið.

Tað siga Javnaðarflokkurin, Tjóðveldi og Framsókn í almennum skrivi í dag.

Flokkarnir heita á Fíggjarmálaráðið og Kommunala arbeiðsgevarafelagið um alt fyri eitt at seta seg við samráðingarborðið.

Óvirðiligt

- At kalla tingið saman, áðrenn allir aðrir møguleikar eru troyttir, er ikki virðiligt. Álvarsama støðan leggur sera tunga ábyrgd á landsstýrið, um at fáa landsstýrismannin í fíggjarmálum at leggja alla orku í at finna eina loysn. At samráðast dag og nátt, til ein loysn fyriliggur, siga Aksel V. Johannesen, Høgni Hoydal og Ruth Vang.

Formenninir og forkvinnan í teimum trimum andstøðuflokkunum siga, at tað máar undan styrkini hjá fakfeløgunum at leggja seg beinleiðis og miðvíst út í verkfalsrættin, sum landsstýrið gjørdi longu frá fyrsta degi. 

- Hetta er eitt álop á alla fakfelagsrørsluna, ið er ein grundsúla undir vælferðarsamfelagi okkara, stendur í skrivinum frá Javnaðarflokkinum, Tjóðveldi og Framsókn.