Ferðafólk kunnu nú blíva koppsett ókeypis í Føroyum

Koppsetingar-kunngerðin er nú broytt soleiðis, at eisini fólk, sum eru fyribils stødd í Føroyum, fáa tilboð um ókeypis koppseting

Sambært gomlu kunngerðini, sum fór úr gildi á midnátt, kundu fólk, sum vóru her í minsta lagi í 30 dagar, fáa ókeypis koppseting.

Tey høvdu rætt til tilboðið frá tí, tey høvdu verið í Føroyum í 14 dagar. 

Tilboðið var tó ikki galdandi, um mett varð, at einasta endamálið við uppihaldinum í Føroyum var koppsetingin.

Í kunngerðini stóð eisini, at føroyingar, sum eru í útbúgving uttan­lands, vóru undantiknir kravinum um uppihald í Føroyum í 14 dagar.

Nú kunngerðin er broytt, stendur bara, at tilboð um ókeypis koppseting er eisini galdandi fyri fólk, sum er fyribils  statt í Føroyum.