Koronukanningarnar hava kostað 30 mió. kr.

Higartil hava koronukanningarnar kostað tilsamans umleið 30 milliónir kr., 15 milliónir í fjør og 15 milliónir higartil í ár.

Tað upplýsir Kaj Leo Holm Johannesen, landsstýrismaður í heilsumálum, í svari til Beintu Løwe, løgtingskvinnu.

Landsstýrismaðurin hevur í svarinum avmarkað kanningarvirksemið til at fevna um tær kanningar, ið Sjúkrahúsverkið hevur skipað fyri.

Av teimum 30 milliónunum, eru 16,5 milliónir kr. fluttar Heilsufrøðiligu starvsstovuni fyri at greina kanningar. 

Thetis fingið 12,6 milliónir

Umleið 12,6 milliónir kr. eru goldnar Thetis fyri greiningar, løn til tey, sum pota, og tilfar til kanningar, t.d. verndarútgerð, potipinngar og gløs.

Haraftrat hevur Smyril Line fingið 900.000 kr. fyri tíðina, tey høvdu tænastuna at samskipa, skipa ferðslu, telefonavgreiðslu og annað fyri sjúkrahúsverkið. 

Kaj Leo Holm Johannesen sigur, at  Heilsufrøðiliga starvsstovan greinar framvegis kanningar fyri sjúkrahúsverkið. Men starvsstovan hevur ongantíð gjørt kanningar fyri heilsuverkið, og er heldur ikki spurd um hetta. Hesum parti taka Thetis og Sjúkrahúsverkið sær av. 

Sjúkrahúsverkið ábyrgdina

Thetis greinar umleið helvtina av kanningunum og Heilsufrøðiliga starvsstovan hina helvtin, og samstarvið hevur verið fyrimyndarligt, sigur landsstýrismaðurin í heilsumálum. 

Hóast Sjúkrahúsverkið hevur latið øðrum uppgávuna at gera og greina koronukanningar, hevur Sjúkrahúsverkið evstu ábyrgd av kanningununum, sum verða gjørdar, og tryggjar, at alt fer rætt fram, sigur Kaj Leo Holm Johannesen í svarinum til Beintu Løwe.