Ógvislig spreinging í Gøteborg

Ein ógvislig spreinging var í einum íbúðarbygningi í Gøteborg í morgun, og millum 20 og 25 fólk eru flutt á sjúkrahús.

Løgreglan hevur staðfest, at talan var ikki um eina gassspreinging, men at ein lutur var orsøkin til spreingingina, skrivar svenska tíðindastovan, TT. Løgreglan sigur seg ikki kunna siga meir um lutin enn, skrivar tíðindastovan.

Fleiri av fólkunum, sum vórðu flutt á sjúkrahús, hava fingið álvarsligan skaða, upplýsa bjargingarlið, sum eru í økinum miðskeiðis í Gøteborg.

Spreingingin var um fimmtíðina í morgun í bygninginum, sum er í fimm hæddum.

Hvussu nógv fólk eru rakt av spreingini, siga bjargingarfólkini seg ikki vita enn, men talan kann vera um 100 til 200 fólk.

Fólkini, sum eru fingin úr bygninginum, eru savnað í eini kirkju tætt við, og løgreglan er farin at avhoyra fólkini.