Drotningin vitjar í Grønlandi

Fríggjadagin vitjar Margretha drotning í Grønlandi.

Hon skuldi upprunaliga vitja í Grønlandi í juli, so í august, men í báðum førum var neyðugt at útseta vitjanina, tí korona gjørdi um seg í Grønlandi.

8. oktober kemur hon so, men ferðin er stytt munandi, tí almenna vitjanin endar longu sunnukvøldið.

100 ár síðani fyrstu kongsvitjanina

Í ár eru 100 ár síðani, fyrsta kongsvitjan var í Grønlandi. Í 1921 var Christian 10., abbi Margrethu, í Grønlandi.  

Drotningin vitjar Ilulissat og Nuuk, hon skal vitja søvn, sigla, vera við í ymsum samkomum, eitt nú í hátíðarløtu í sambandi við, at tað eru 300 ár síðani, at Grønland var kristnað.

Sunnudagin er Margretha við til bispavígslu í Hans Egede Kirke í Nuuk, og um kvøldið er nýggi bispurin, Paneraaq Siegstad Munk, vertur fyri døgurða á Hotel Hans Egede.