Stevndur fyri brotsverk móti mannaættini

Brasilski forsetin, Jair Bolsonaro, er meldaður fyri brotsverk móti mannaættini við at hava skundað undir veðurlagsbroytingar í sambandi við skógarhøgging í regskóginum í Amazonas.

Tað er eysturríkski umhvørvisfelagsskapurin, Allrise, sum hevur stevnt Bolsonaro inn fyri altjóða revsidómstólin, ICJ.

Sambært felagsskapinum, standa Bolsonaro og stjórnin hjá honum á odda fyri átaki, sum m.a. ger, at fólkið í heiminum er í vanda í sambandi við veðurlagsbroytingar.

Stjórnin hjá forsetanum verður skuldsett fyri á skipaðan hátt at strika lógir, sum verja regnskógin, og fyri at hava ábyrgdina av, at umleið 4.000 ferkilometrar av regnskógi verða lagdir í oyði hvørt ár.

Umsitingin hjá Bolsonaro hevur higartil ikki svarað spurningum frá AFP-tíðindastovuni um málið.