KÍ veitslan útsett

Støðan við koronusmittuni hevur við sær, at nevndin í KÍ hevur gjørt av at útseta ársveitsluna, sum skuldi vera komandi leygardag Í badmintonhøllini í Klaksvík. 

Fleiri enn 600 viðhaldsfólk hava keypt atgongumerki til gullveitsluna.

Veitslan verður í staðin hildin leygarkvøldið 20. november.

Nevndin ger greitt, at tað snýr seg um heilsuna hjá fólki, og við verandi koronustøðu er løtan ikki tann rætta til at savna fleiri hundrað fólk til gullveitslu, sum annars var lagt upp til, nú bæði kvinnurnar og menninir hjá KÍ í Betrideildini eru føroyameistarar.

- Vit harmast sjálvsagt um at útseta veitsluna, men hetta er tað rætta at gera, sum støðan er í løtuni, sigur Tummas Lervig, formaður í KÍ, og leggur afturat, at nú ræður um at hava tol, meðan bíðað verður eftir, at tamarhald aftur er á koronustøðuni.

Keypt atgongumerki eru galdandi 20. november, men um tað berst fólki frá at møta, ber til at fáa pengarnar aftur við at venda sær til felagið.