Joe Biden á ferð í Evropa

Amerikanski forsetin, Joe Biden, er í Evropa í hesum døgum. 

Í nátt lendi Joe Biden í Rom, har hann í dag hevur vitjað Frans Páva í Vatikaninum. 

Joe Biden er sjálvur katolikkur. Hann takkaði pávanum fyri at hjálpa teimum fátøku og teimum svongu, og fyri at vera undangongumaður í stríðnum at steðga veðurlagsbroytingum.

Seinni í dag skal Biden hitta franska forsetan, Emmanuel Macron, sum eisini er í Rom.

Teir báðir skulu slætta sjógvin sínamillum, eftir at Avstralska stjórnin gjørdi samstarvsavtalu við amerikanarar heldur enn fransmenn um nýggjar kavbátar.

Leygardagin og sunnudagin hittast G20 londini í Rom fyri at kjakast um veðurlagsbroytingar og orkukreppuna.

Og mánadagin fer Joe Biden á veðurlagsráðstevnuna COP26 í Glasgow.