Omikron komið til Íslands og USA

Omikron er komið til Íslands, skrivaði Mogunblaðið í gjárkvøldið.

Eitt fólk, sum var á sjúkrahúsi í Reykjavík, tí tað hevði koronu, fekk staðfest omikronfrábrigdið. 

Viðkomandi hevur ikki verið uttanlands, og læknarnir vita ikki, hvussu sjúklingurin er smittaður.

Eisini í USA

Fyrsti tilburðurin av omikorn virusinum er nú eisini staðfestur í USA, og myndugleikarnir bera ótta fyri, at virusið fer at breiða seg.

Í Danmark eru fleiri tilburðir av omikron staðfestir aftrat.

Trý fólk sum høvdu verið í Suðurafrika, og eitt fólk sum hevði verið í Qatar, vóru smittað við omikron-frábrigdinum

Umframt tey, so verða 17 aðrir tilburðir kannaðir, tí tekin eru um, at eisini tey fólkini eru sjúk av omikron-frábrigdinum.

Triðja prikið

Myndugleikarnir í Danmark heita á fólk um at fáa sær triðja prikið, og ætlanin er at koppseta tvær ferðir so nógv fólk um vikuna, sum higartil.

Henrik Ullum, stjóri í Serumstovninum, sigur, at arbeitt verður við at økja koppsetingina, so Danmark kann sleppa undan at lata aftur í vetur, skrivar DR.