Holland letur aftur

Í gjár vóru fleiri enn 14.000 fólk smittað við koronu í Hollandi, sum hevur eitt fólkatal upp á 17 milliónir. Serliga er tað omikron frábrigdið, sum er farið at gera um seg.
 
- Tí sleppa vit ikki undan at lata landið aftur enn eina ferð, sigur Mark Rutte sambært tíðinastovuni Ritzau.  

Hetta hevur við sær, at matstovur, barrir og mentanarlív letur aftur í dag, og bert matvøruhandlar og apotek kunnu hava opið.  

Børnini sleppa heldur ikki í skúla fyrr enn í fyrsta lagi 9. januar.  

Átøkini eru neyðug fyri at fyribyrgja, at sjúkrahúsverkið hoknar av trýstinum. 
Sambært Ritzau er trýstið á hollendska sjúkrahúsverkið í løtuni so mikið stórt, at annað virksemi verður niðurraðfest fyri at hava neyðugu orkuna til koronusjúklingar, sigur hollendski forsætisráðharrin.

Átøkini í Hollandi eru fyribils galdandi til 14. januar.  

Eisini í fleiri øðrum evropeiskum londum er Omikron-frábrigdið farið at taka dik á seg og er orsøk til avmarkingar.  

Í gjár setti talið av smittutilburðum í Bretlandi met við 93.000 tilburðum - 10.000 av teimum vóru omikron. Tískil er samlaða talið av omikron-tilburðum í Bretlandi 25.000.  

Í Danmark var beint fyri vikuskiftið boðað frá nýggjum átøkum í eini roynd at tálma smittustøðuni í landinum. Samlaða talið av omikron-frábrigdinum í Danmark er umleið 13.000.