Royna at fáa greiðu á nevndarsessunum í politisku fløkjuni

Umsitingin hjá løgtinginum er farin at kanna hvør mannagongdin er við nevndarsessum, tá tvey landsstýrisfólk samstundis taka sæti aftur á tingi. 

Sambært Jógvani á Lakjuni, løgtingsformanni, er vanliga mannagongd, at tá eitt landsstýrisfólk verður loyst úr starvi tekur viðkomandi við teimum nevndarsessum, sum avloysarin hevur røkt. 

Men nú talan er um tvey landsstýrisfólk, sum koma í staðin fyri tvey tingfólk, er óvist hvør avloysir hvønn. 

Og tað hevur løgtingsformannin biðið umsitingina fáa greiðu á. 

Elsebeth og Jacob

Støðan er íkomin eftir, at Elsebeth Mercedis Gunnleygsdóttur og Jacob Vestergaard í farnu viku løgdu frá sær, sum landsstýrisfólk í ávikavíst almannamálum og fiskivinnumálum.

Tað førdi við sær, at teirra varafólk, Annika Olsen og Brandur Sandoy, mistu sæti á tingi. 

Annika Olsen var nevndarlimur í Uttanlandsnevndini og Trivnaðarnevndini, meðan Brandur Sandoy sat í Uttanlandsnevndini.