Champions League-finalan flutt til París

Santa Pætursborg verður ikki vertsbýur fyri Champions League-finaluni. Tað boðar UEFA frá fyrrapartin.

Dysturin skal í staðin spælast á Stade de France í Saint-Denis norðanfyri París.

Evropeiska fótbóltssamgongan hevur eisini avgjørt, at russisk og ukrainsk feløg eins og landsliðini ikki sleppa at spæla sínar dystir á heimavølli.

Dystirnir skulu í staðin spælast á uttanveltaðum leikvølli.

Trýst á UEFA

Trýst hevur verið lagt á UEFA síðstu tíðina fyri at fáa finaluna flutta - millum annað frá bretsku stjórnini. Eisini hevur felagið fyri evropeisk fótbóltsviðhaldsfólk, Football Supporters Europe, heitt á UEFA um at taka finaluna frá russiska býnum, og tað hevur UEFA nú gjørt.

Finalan í størstu evropeisku kappingini fyri feløg verður spæld 28. mai.