Dregur út at umvæla Bollafabrikkina

Arbeiðið at umvæla Klaksvíkar Hermetikk, vanliga rópt Bollafabrikkin, á Stongunum í Klaksvík dregur út.

Arbeiðið at skifta tekju, klædning, vindeygu, úthurðar og eftirbjálva virkisbygningin var boðið út í fjør summar, og umvælingin byrjaði í heyst.

Vindeygu og hurðar eru skift, og arbeiðið at klæða bygningin er komið langt. 

So skjótt sum veðrið batnar, verður farið undir at bjálva og leggja tak á bygningin, skrivar Klaksvíkar kommuna. 

Er á varðveitingarlistanum 

Bygningurin, sum er bygdur í fleiri stigum, har elsti parturin varð bygdur í 1930-unum, er á varðveitingarlistanum hjá Klaksvíkar kommunu. 

Hann er 640 fermetrar til støddar og er í tveimum hæddum.

Kostnaðurin fyri arbeiðið verður góðar tríggjar milliónir krónur. 

Bollafabrikkin, Klakksvíkar Hermetikk, Klaksvík

Soleiðis fer Bollafabrikkin at síggja út, tá umvælingin er liðug (Mynd: Klaksvíkar kommuna)